Успенский женский монастырь

Пе́снь 1.

Прииди́те, ве́рнии, пе́снь духо́вную возопие́м и просла́вим Христа́, возвели́чившаго вели́каго кня́зя честна́го Влади́мира, святы́м апо́столом равностоя́теля, крести́теля Руси́, иже на хо́лмех Кля́зьмы реки́ тезоимени́тый себе́ гра́д заложи́л еси́.

Блаже́ннаго Макси́ма, первосвяти́теля Росси́йский земли́, досто́йно да восхва́лим, се́й бо, повеле́нием Бо́жия Ма́тере пребыва́ние Всеросси́йских Влады́к во гра́д Влади́мир пренесе́, в не́мже благоче́стно пожи́в, на ве́ки в до́ме Пресвяты́я Богоро́дицы упоко́ися.

Епи́скопами гра́да Влади́мира поста́вленных и сия́нием доброде́телей христиа́нских всеукраше́нных, святи́телей Петра и Алекси́я возвеличим, Богоуго́дное житие́ свое́ во сто́льном гра́де Москве́ сконча́вших, и ныне моляшихся о е́же спасти́ся ве́рою и любо́вию чту́щим их па́мять.

Богородичен: Яко благодатное сокровище дарова́ла еси́ Святе́й Руси икону Твою Владимирскую, е́юже отце́м нашим многоча́стне и многообра́зне благоде́яла еси́. Не оскуде́й и ныне, о Мати Божия, утоля́ющи лю́тое на нас воста́ние, и зе́млю Ру́сскую спаси́.

Пе́снь 3.

Князю Боголюби́вому страстоте́рпцу Андрею духовныя песни принесе́м, Владимирския земли самодержцу благочести́ву и собо́рныя це́ркве основа́телю и украси́телю, соше́дшеся к цельбоно́сней ра́це нетле́нных моще́й его, просим грехов разреше́ния и ми́рнаго жития́ у Христа Бога.

Благую о́трасль великаго князя Андрея блаже́ннаго князя Глеба, во ю́ности во́зраста своего́ ко Го́споду отше́дшаго в чистом и богоуго́дном житии, защи́тника Влади́мирския земли́ и все́м чту́щим его изря́днаго покрови́теля восхвалим.

Прославим святаго благове́рнаго вели́каго кня́зя Гео́ргия, доброде́телей христиа́нских зерца́ло, по глаго́лу ева́нгельскому ду́шу свою́ на по́ле бра́ни с нечести́выми тата́ры за лю́ди своя́ и оте́чество положи́вшаго и до дне́сь источа́ющаго приходя́щим к ра́це его то́ки чуде́с.

Богородичен: Владимира града Росси́йския держа́вы благочести́вый народ просвети́ла еси́, о Преблагослове́нная Богоро́дице Мари́е, Андрее́вым принесе́нием чудотво́рнаго Твоего о́браза, его́же списа́ Богогла́сный евангели́ст Лука́.

Пе́снь 4.

Прииди́те, собра́вшеся, пе́сньми преподо́бнаго вели́каго кня́зя Алекса́ндра ублажи́м, Росси́йстей земли́ богодарова́ннаго защи́тника и Це́ркве Ру́сския изря́днаго попечи́теля, с благопло́днейшею своею ве́твью, во пресла́вном гра́де Влади́мире прозя́бшею, кня́зем Дании́лом на Небесе́х ны́не предстоя́, испроси́те оте́честву на́шему ми́р и ве́лию ми́лость.

О блаженный страстотерпче Христов, Богому́дре кня́же Гле́бе, Му́рому гра́ду, во тьме́ язы́чества пребыва́вшему, све́та ева́нгельскаго пе́рвый провозве́стниче, не забуди отечества своего, глад и озлобле́ние отгоня́я и от грехопаде́ний междоусо́бия избавля́я ны.

Святи́и кня́зие Константи́не, Михаи́ле и Фео́доре, му́ромских жи́телей ко свято́му Креще́нию приве́дшии, моли́твами ва́шими све́том Ева́нгелия просвети́те ду́ши на́ша и к любви́ Го́рней наста́вите на́с, ве́рою почита́ющих ва́с, досточу́днии.

Богоро́дичен: К чудотво́рному о́бразу Твоему́, Боголюби́вая Ма́ти, усе́рдно притека́ем, на всеси́льное предста́тельство Твое́ пред Сыно́м и Бо́гом упова́ем и любо́вию вопие́м Ти́: ра́дуйся, Боголюби́вая Цари́це Богоро́дице, Наде́ждо и Прибе́жище на́ше!

Пе́снь 5.

Фео́дору и Иоа́нну слава, Су́ждальским свети́льником, Си́мону и Диони́сию! С ними да пою́тся и Евфимий, в по́двизех превысо́кий и досточу́дный Иларио́н святи́тель, пресве́тлая Суждальская звезда.

Благоче́стия сто́лп непоколеби́мый яви́лся еси́, святи́телю о́тче Арсе́ние, све́том доброде́телей твои́х осия́вый Су́здальский уде́л, ны́не же в селе́ниих пра́ведных водворя́яся, моли́ся Го́сподеви сыново́м росси́йским спасти́ся, священноле́пно чту́щим святу́ю па́мять твою́.

Су́здаль гра́д и вся́ Влади́мирская страна́ те́плыя к ва́м обраща́ют моли́твы и сердца́, ди́вная дво́ице Христо́вых благослове́нных неве́ст, преподо́бныя Евфроси́ние и Софи́е, вме́сто бога́тства нищету́ и́ноческаго жития́ избра́вшие и вме́сто сласте́й всесоверше́нное воздержа́ние возлюби́вшии.

Богоро́дичен: Днесь све́тло красу́ется сла́внейший град Влади́мир, в не́мже бы́ша Влады́чице, дивное явле́ние Твое́ святи́телю Макси́му, Его́же ныне воспомина́юще, благода́рно славословим Тя.

Пе́снь 6.

Благосла́внаго гра́да Му́рома архипа́стырю всеблагогове́йнейший, Богому́дре о́тче на́ш Ио́но, на высо́кий степе́нь первопресто́льников Правосла́вныя Руси́ возведе́нный, не преста́й моля́ся о па́стве твое́й, священноле́пно па́мять твою́, достохва́льне, соверша́ющей.

Ди́вная супру́гов дво́ица да просла́вится дне́сь: святи́и благове́рнии Пе́тр и Февро́ния, Му́рома гра́да ве́лие украше́ние и все́м христиа́ном ско́рии помо́щницы, неду́гов на́ших целе́бницы и скорбе́й уте́шители.

Му́ромскаго кра́я всесве́тлое украше́ние, воспое́м святу́ю пра́ведную Иулиани́ю, Ла́заревскую похвалу́, та бо в ми́ре богоугодно поживе́ и ми́лостыню к ни́щим безме́рну показа́, сего́ ра́ди обре́те благода́ть чуде́с Бо́жиим веле́нием.

Богоро́дичен: О, Ма́ти Бо́жия и Дево! в моли́тву приво́дим Тебе́ чудотво́рцев Влади́мирских, и́хже предста́тельством при́сно покрыва́й нас в житии́ сем, сподо́би же и нас невече́рняго дне́ во Ца́рствии Сы́на Твоего́.

Конда́к, гла́с 4:

Я́ко зве́зды пресве́тлыя Це́ркве Росси́йския, испове́данием Правосла́вныя ве́ры в то́й возсия́вшии, вси́ святи́и земли́ Влади́мирския: Богому́дрии святи́телие и благове́рнии кня́зи, преподо́бнии отцы́ и ма́тери, страстоте́рпцы и пра́ведницы, Христу́ Бо́гу усе́рдно моли́теся, грехо́в оставле́ние дарова́ти любо́вию чту́щим святу́ю па́мять ва́шу.

И́кос:

Красне́йшее соцве́тие, святи́и, в до́му Бо́жии процвели́ есте́ по́двигами ве́ры и благоче́стия, изря́днейшия плоды́ принесли́ есте́ доброде́телей, и́миже украша́ющеся, мно́гими чудесы́ земно́е оте́чество ва́ше обогати́ли есте́. Сего́ ра́ди любо́вию воспева́ем ва́м: ра́дуйтеся, Небе́снаго оте́чества святи́и гра́ждане; ра́дуйтеся, А́нгелов собесе́дницы и святы́м сожи́телие. Ра́дуйтеся, ди́вныя зве́зды, Не́бо церко́вное украша́ющия; ра́дуйтеся, благослове́нных градо́в Влади́мира, Су́здаля, Му́рома, Юрьева и Александрова свети́льницы многосве́тлии и сокро́вище благода́тное. Ра́дуйтеся, предста́телие на́ши пред Бо́гом усе́рднии, хода́тайством свои́м проше́ния на́ша предваря́ющии; ра́дуйтеся, во все́х обстоя́ниих на́ших ско́рии помо́щницы. Ра́дуйтеся, вси́ святи́и Влади́мирския земли́, земна́го оте́чества ва́шего похвало́ и утвержде́ние!

Пе́снь 7.

Ю́рьева гра́да всехва́льное прозябе́ние воспоим, преподо́бнаго Ни́кона, от ю́ности до́браго послу́шника и по́двигом сотаи́нника вели́каго Богоно́снаго а́ввы Се́ргия, с ни́мже Триеди́ному Бо́гу в ли́це святы́х предстоя́, моли́ся и на́м ра́дости сея́ сопричасти́тися.

Я́ко зла́то в горни́ле, искуси́лся еси́, в Ма́хрищской пусты́ни живя́, преподо́бне Стефа́не, равноа́нгельне! Богоно́сному Се́ргию, во изгна́нии су́щему, бра́тскую любо́вь яви́вый, все́м же, приходя́щим к тебе́, к Го́рнему Оте́честву до́брый и ве́рный путево́ждь бы́вый, егоже и на́с моли́твами твои́ми сподо́би дости́гнути, преподо́бне.

Ублажим Рома́на преподо́бнаго — учени́ка возлю́бленна Богоблаже́ннаго а́ввы Се́ргия, па́стыря устро́енныя им на Киржаче́ реце́ оби́тели, свяще́нства да́р от ру́к Богому́драго святи́теля Алекси́я приявшаго и пресветлым житием в Царствие Божие восшедшаго.

Богоро́дичен: Черто́же незаходи́маго Све́та, Де́во, Све́том Рождества́ Твоего́, просвети́ ду́ши на́ша, святы́х Влади́мирския земли́ те́плыя моли́твы прие́млющи.

Пе́снь 8.

Повеле́нию Пресвяты́я Богоро́дицы от яви́вшейся тебе́ на Я́хроме реце́ светоза́рныя ико́ны благогове́йно вне́мля, и  тамо богоуго́дное житие́ во а́нгельстем о́бразе смире́нно проводя́, в преми́рная селе́ния дости́гл еси́, Космо́, преподо́бне о́тче на́ш, моли и нам бла́г ве́чных сподо́битися.

Благоче́стия дре́вния Влади́мирския земли́ восприе́мника, оби́тели Пресвяты́я Богоро́дицы на Я́хроме реце́ Богому́драго игу́мена, святи́теля па́ствы Воро́нежстей и всея Росси́йстей Це́ркви Митрофа́на пе́сньми восхва́лим.

Приспе́ день торжества́ святы́х земли Влади́мирския и память преподо́бных отец Алекса́ндровских Лукиа́на, добродетели жилищем светлым ся сотво́ршаго и Корни́лия, си́лою Бо́жиею диа́вола попра́вшаго, моли́теся ко Го́споду, дво́ице пресла́вная, да да́рует нам избавление от страстей и вся́каго наве́та вра́жия.

Богоро́дичен: Гряди́те, ве́рнии, Ду́хом Боже́ственным ра́дующеся, Ю́же от непло́дове прише́дшую челове́ков на спасе́ние Присноде́ву Отрокови́цу пе́сньми почти́м, иже от иконы своея Рождества Лукиановския изливает милости всем, с любовию притекающим к Ней.

Пе́снь 9.

Воспои́м све́тло мона́шескаго жити́я в Алекса́ндровстей земли́ устрои́теля блаже́ннаго Зоси́му, чу́дным житие́м свои́м всех наставля́ющаго ми́ру не прилепля́тися, крест свой на ра́мена взя́ти и во след Хри́сту ше́ствовати.

Ста́рчества святы́х оте́ц насле́дницы, в труде́х и ско́рбех созида́вшии ду́ши свои́, моли́твы Иису́совой де́латели и учи́тели изря́днии, пресла́внии ста́рцы Зоси́мовские Алекси́е и Ге́рмане, и нас бы́ти ученица́ми ва́шими сподо́бите.

Но́вии страстоте́рпцы Влади́мирстии, во главе со святи́телями Никола́ем, Афа́насием и Германом, му́ченически по́прище земно́е сконча́вшии и страда́ньми дерзнове́ние ко Го́споду приобре́тшии, моли́теся Ему́, ва́с укре́пльшему, да и мы́, егда́ на́йдет на ны́ испыта́ния ча́с, му́жества да́р Бо́жий восприи́мем.

Богородичен: О Де́во Благода́тная, град́ы и ве́си наша честна́го ли́ка Твоего́ изображе́нии обогати́вшая, благодаре́ние на́ше приими́ и от бед лю́тых оте́чество на́ше изба́ви, вси бо Тя, яко Покро́в всемо́щный земли́ на́шея, велича́ем.