Служба преп. Лукиану

Месяца сентября в 9-й день преставление преподобного Лукиана Александровского

НА ВЕЛИЦЕЙ ВЕЧЕРНИ

Блажен муж: 1-й антифон. На Господи, воззвах: поставим стихов 8 и поем стихиры святых Богоотцев на 4: и преподобного Лукиана на 4, глас 1-й. Подобен: Небесных Чинов:

Небесных радований причастниче,/ земли нашея крепкое предстательство,/ преподобне отче Лукиане,/ моли за ны, к тебе прибегающия,/ яко на тя упование,// по Бозе и Богородице возложихом.

Небесных красот желая,/ от юности Богу приложи свой смысл,/ безмолвным житием тщался еси благоугодити Ему,/ многия беды и напасти претерпевя,/ постом и молитвою вся козни вражия сокрушил еси,// темже тя любовию ублажаем.

Небесное семя приим,/ плод сторичный добродетели принесл еси / и обители во славу Пресвятыя Богородицы воздвигл еси,/ образ хотящим по тебе спастися явися,/ подвиг твой до конца непоколебимо соблюл еси,//темже ныне твое честное преставление почитаем.

Небеснаго исполнь разума,/ стаду словесному Христову явился еси учитель./ Благосказанием словес твоих Церковь Христова украшается,/ Лукиане богомудре,/ подаеши вся яже на пользу прилежно молящим ти ся,// и тебе венчавшаго Христа прославляющим.

Слава, глас 6:

Небесных достигл еси, на земли живый,/ темже в тя вселися благодать Пресвятаго Духа,/ еже провидети будущая, яко близ настоящая./ И Пресвятыя Богородицы истый служитель быв,/ обителей Ея непрелeстен поборник и доблий строитель./ Тою умоли, святе,/ спасти всех иже верою и любовию благочестно славящих // честнe Рождество Ея.

И ныне: праздника, глас тойже: Днесь неплодная Анна:

Вход. Прокимен дне. Чтения три преподобническия.

На литии стихира праздника, глас 1-й:

Начало нашего спасения:

И святаго, глас тойже:

Удивишася боголюбивии родители твоя,/ зряще твое еже по Богу от юности житие,/ помышляюще хотящая от тебе напоследок быти, отче./ Ублажаем труды и болезни твоя,/ имиже яко злато искушено в горниле, сияя, явися,/ Небесная воинства удивил еси терпением своим./ Дерзновение имея ко Христу Богу,// мир испроси душам нашим.

От юности, преподобне, Бога возлюбив,/ тленную же славу возненавидев,/ страх Божий стяжал еси в сердце своем,/ темже удалился еси бегая и водворился еси в пустыни,/ идеже многими труды и воздержанием / Пречистыя Богоматере обители добре снабдел  еси,/ и множество инок любомудренно собрал еси,/ устав общежительный сим ясно изъяви,// Богу ти присно  содействующу.

Слава, глас 8-й:

Преподобне отче Лукиане,/ добродетелей искусный подвижник явился еси,/ наития вражия доблественне поправ./ И десницею Божиею наставляем обрел еси место сие,/ идеже пустыню многожительну составил еси,/ прилежно Царице Небесней служа,/ слезными источники душу свою омывая / пред образом честнаго Ея Рождества./ И был еси чисто приятелище Божественнаго Духа,// Егоже моли спасти и просветити души наша.

И ныне: праздника, глас тойже: В благознаменитый день:

На стиховне стихиры, глас 6-й. Подобен: Все отложше:

Преподобне отче Лукиане,/ Божественною любовию ты от мира отчужися / и за иже нас ради с небес странствовавшаго странен был еси / и в пустыню дошед, никакоже бояся невидимых враг коварствия,/ от безумных человек поношение и укоризну,/ радуяся, претерпел еси незлобиво,/ и в темнице столп светел благочестия огнесиянен явися,/ сего ради от Московскаго Первосвятителя пастырь иноком поставляешися,/ихже непорочно ко Христу путеводил еси,// Егоже моли даровати душам нашим велию милость.

Стих: Честна пред Господем / смерть преподобных его.

Преподобне отче Лукиане,/ постником украшение и похвало,/ ты измлада житие богоугодно / и чистотою исполнено имел еси / телесная своя чувства огорчевая злостраданием терпеливно,/ страстей посекая корения и бесом погубляя стремления,/ темже Духа святаго зарями блистаяся, пребогате,/ прозревал еси будущая, яко настоящая,/ и почесть трудов твоих от Христа прият,// Егоже моли даровати душам нашим велию милость.

Стих: Блажен муж, бояйся Господа, / в заповедех Его восхощет зело.

Преподобне отче Лукиане,/ ты в пустыни жительствуя,/ единому Богу себе возложив,/ восприял еси со безплотными житие духовное,/ многим ко спасению наставник явился еси,/ благодати источник, устава положник,/ молебник крепчайший и учитель действенный./ Мы же собранная твоя чада,/ к честным мощем припадая с любовию вопием:/ моли Христа Бога даровати душам нашим велию милость.

Слава, глас 2-й:

Преподобне отче Лукиане,/ тесным и прискорбным путем шествуя в земнем житии,/ человеки научил еси презирати маловременная,/ вечных благ наследник явися,/ Небеснаго Царствия житель сый,/ тамо ныне со ангелы ликовствуеши./ Прилежно молися Владыце Христу / даровати мирови мир и Церкви утверждение // и душам нашим велию милость.

И ныне: праздника, глас тойже: Пронареченная всех Царица:

На благословении хлебов тропарь святаго дважды и праздника единожды.

Тропарь святаго, глас 8:

От юности зову Божию последовал еси ревностно,/ монашескую стезю во спасение, яко Крест Господень избравый,/ благодать Христову многим терпением обильно восприяв,/ обители eq \o (и;´)ночествующих премудро устроял еси,/ подаяй всем смиренный образ своего жития,/ темже усердно с любовию молим тя;/ преподобне отче наш Лукиане,/ пустынь твою и град Александров // сохрани от всякаго зла и спаси нас.

НА УТРЕНИ

На Бог Господь: тропарь праздника и Богоотцев. Слава: преподобнаго. И ныне: праздника.

По 1-м стихословии седален, глас 4-й:

Обителей строителя богомудраго/ и пастыря словесных овец Христовых добраго,/ грешником поручника и благотекущих обучителя,/ иноком скораго помощника и предстателя,/ Божия Матере изряднаго служителя/ восхвалим Лукиана преподобнаго. (дважды)

Слава, и ныне: праздника, глас тойже: Возопий, Давиде:

По 2-м стихословии седален, глас тойже:

В земли Александровстей вселився, преподобне,/ пустынное озлобление усердно подъял еси,/ обители Пречистыя Богоматере прилежно устрояя,/ слезныя капли с непрестанною молитвою совокупил еси./ молися  о чадех твоих, Лукиане всехвальне,/ честное житие твое и преставление славящих. (дважды)

Слава, и ныне: праздника, глас тойже: От корене Иессеева:

По полиелее седален, глас 8-й:

Духом горяй ко Господу, Лукиане блаженне,/ земная и мимотекущая возненавидел еси,/ прозябение красное пустыни явися,/ укоризну от человек и озлобление усердно подъял еси./ Божия Матере чудотворней иконе радостно покланяяся,/ воздвигл еси монашествующих множество / к ревности ангельскаго жития./ Славится тобою Александровская земля,/ еяже пророчески омакаше слезами,/ мы же сердцем и усты поюще тя ублажаем.

Слава: глас тойже:

Божественным мановением подвигся от младаго возраста,/ подвизался еси неленостно в жизни временней,/ страх Божий возлюбив, преподобне отче,/ и в заповедех его присно поучаяся./ Иноков воистину наказуя изрядными правилы,/ яко кадило благовонное неослабными молении/ землю нашу облагоухал еси./ Тем видев Господь твое доброе изволение,/ со всеми учини  тя преподобными и праведными,/ с нимиже моли спастися нам.

И ныне, праздника, глас тойже: Обновися, Адаме:

Таже степенна, 1-й антифон 4-го гласа. Прокимен, глас 4-й: Честна пред Господем: Евангелие от Матфеа, зачало 43.

По 50-м псалме стихира, глас 8-й:

Преподобне отче Лукиане,/ твое богоугодное житие бысть нам просвещение,/ яко тесным и прискорбным путем шествовал еси/ и достигл еси Царствия Небеснаго./ Богу ти помогающу обители основал еси/ и вражию обличил еси силу,/ в служении своем к Богоматере трудолюбно подвизаяся,/ темже притекающе к честным мощем твоим,/ верою и любовию тя ублажаем.

Канон праздника и богоотцев на 8. И преподобнаго Лукиана канон на 6, глас 8-й, егоже краегранесие без Богородичнов: Христос венчает тя, блаженне.

Песнь 1-я

Ирмос: Колесницегонителя фараоня погрузи/ чудотворяй иногда,/ Моисейский жезл крестообразно поразив/ и разделив море,/ Израиля же беглеца пешеходца спасе,/ песнь Богови воспевающа.

Христу прилеплялся от юности, преподобне Лукиане,/ всегубительное стремление страстей увядил еси,/ навождения вражия и помыслы лукавыя отринув,/ душу твою слезными потоки украсил еси/ и явился еси яко река, землю нашу словом учения напаяя.

Радуяся выну о Дусе Святе, Лукиане премудре,/ земная и скоротекущая измлада во уметы вменил еси,/ силою Крестною потопляя демонов полки,/ заповедей Владычних соблюдением рая наследник показася,/ темже был еси сокровище чадом твоим нетленно.

Иже от Бога помощь на борительныя враги приемый,/ усердно мирскаго многоволненнаго смущения отбег,/ к тихому пристанищу безмолвия притекл еси,/ смертную восприяв память и жизнь нескончаемую,/ темже моли спастися любовию поющим тя.

Богородичен: Страсти плоти моея,/ и ума моего двизания утоли,/ молю тя, Пречистая Дево,/ и исправи мя, заблуждшаго умом.

Катавасия: Крест начертав:

Песнь 3-я

Ирмос: Утвердися сердце мое в Господе,/ вознесеся рог мой в Бозе моем,/ расширишася на враги моя уста моя,/ возвеселихся о спасении твоем.

Силою Божественною укрепляем, блаженне Лукиане,/ предпочел еси тесный и болезненный путь,/ во слезах и воздыханиях всю свою жизнь прошел еси,/ райския обители и тамо святых веселие всегда во уме поминая, с нимиже ныне пребывая, моли спастися нам.

Твердостию разума духовнаго укрепляем, преподобне,/ познавал еси явственне страсти душевныя,/ и гордыню диаволю низложил еси,/ образ Божий неврежден в себе соблюдая,/ темже колеблемыя страстей бурею утверди ны твоими молитвами.

От матерня чрева прилепился еси Богу, преподобне,/ темже и Христос утверди сердце твое ко страху Своему,/ столп крепкого благочестия явился еси разслабленно житие имущим,/ утверждая ближния твоя прозорливыми словесы/ и крепкою твоею молитвою.

Богородичен: В ложесна Твоя воплощаем, Всенепорочная,/ вселься Зиждитель,/ на благодеяние верно поющим Тя.

Кондак и икос праздника.

Таже преподобнаго седален, глас 4:

Пустынный житель и в телеси ангел,/ преподобне отче наш Лукиане,/ от деяния на высоту божественнаго видения востекши,/ был еси пастырь и наставник последующим равноангельному житию твоему/ и стяжал еси многое дерзновение ко Христу Богу,/ егоже моли спасти поющия тя.

Слава, глас тойже:

Мраз нощный претерпел еси/ и тяготу вара дневнаго понесл еси,/ образ добр был еси всем любящим Господа,/ от уст бо твоих благодать Святаго Духа излияся./ Поминай чада твоя и не забуди, якоже обещался еси/ назирати и по смерти святыя обители твоя.

И ныне, глас тойже, праздника: Дева Мария и Богородица:

Песнь 4-я

Ирмос: Услышах, Господи,/смотрения Твоего таинство,/ разумех дела Твоя/ и прославих Твое Божество.

Сокровище духовных даров умножити желая,/ Духом Святым движим изшел еси, мудре, в пустыню,/ от Негоже наставляем, обрете со земным покоищем Небесное Царство/ и привел еси множество спасаемых Господеви, пребогате,/ выну прославляя Того Божество.

В место от места преходя бегая славы человеческия,/ небесныя славы рачитель был еси, Лукиане преподобне, /древния обители оставляя, пустынь населяеши,/ и храм Божия Матере обновляя, благолепно украшаеши,/ славословя безлетнаго Ея Сына Божество.

Естество плотское умертвившаго добродетельными подвиги,/ и евангельскою любовию уязвившаго свое сердце,/ стадо свое добре упасшаго, Лукиана блаженнаго/ приими, Христе Боже, о нас молитву,/ с нимже прославляем Твое Божество.

Богородичен: Нива духовная,/ якоже из бразды клас изнесла еси, всю тварь питающаго,/ всяческих Бога, Приснодево.

Песнь 5-я

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам, Человеколюбче.

Низвергл еси кротостию вся вражия ополчения, отче:/ разжегл бо еси окаянный завистию начальника обители Симеоновския,/ иже яростию подвигшись, пустынь твою разорити повелевает,/ тебе же наветами во град Москву в заключение ввергает,/ обаче по кончине твоей слезное покаяние принесе.

Честен сосуд явился еси Божественнаго Духа,/ светлыми зарями подвигов твоих, Лукиане богоносе,/ и пастырь овцам, пасомым на пажити Божия Матере,/ научая чада твоя достойно ходити вслед Сына Ея и Бога,/ во смирении Тому служащим спасение подающаго.

Ангельскому поревновав житию, преподобне отче,/ яко маслина был еси плодовит добродетельми и душепитательными словесы,/ тьму людских невежествий молитвами своими разгоняя,/ темже светлостию Божественною на земли просветися,/ просвещая с верою к тебе приходящих.

Богородичен: Исцели недугующаго ума моего омрачение,/ врача рождшая Христа,/ Всенепорочная Владычице.

Песнь 6-я

Ирмос: Очисти мя, Спасе,/ многа бо беззакония моя/ и из глубины зол возведи, молюся,/ к Тебе бо возопих, и услыши мя,/ Боже спасения моего.

Егда благодатию Духа смиренную стяжал еси мудрость,/ глубину безмерных согрешений чистым житием прешел еси,/ слезами молитвенными паче, нежели богатством земным обители своя созидая/ и присно взывая ко Господу, Лукиане блаженне,/ да от тли греховныя соблюдет дело руку твоею.

Течение страстей безстрастием удержал еси, преподобне Лукиане,/ наздав убо чувства, был еси вне мирскаго мятежа,/ воины духовныя во бранех со враги невидимыми к победам руководил еси,/ искушен бо быв сам в подвизех пустынных,/ и искушаемым удобно помогал еси тли греховныя избегати.

Терпя потерпел еси гонение от братии обители Спасовой,/ дал место гневу Божию, за себя не мстя отнюдь,/ с миром изшел еси от обители, идеже прежде начальствова, Лукиане богомудре,/ яко чист душею и от всякия злыя вещи удален,/ да и нас избавиши от соблазна и козней вражиих.

Богородичен: Господь с Тобою Пречистая,/ якоже изволил есть, быв Отроковице,/ всех нас от области льстиваго ходатайством Твоим избавил есть:/ темже Тя ныне по долгу родове родов ублажаем.

 Кондак прп. Лукиану, глас 8:

Яко строитель многих святых обителей был еси,/ преподобне отче Лукиане,/ душу свою и души верныя тебе в Небесный Чертог в трудах созидая,/ идеже в сладости Пресветлаго Жениха Христа обрел еси,/ неизреченныя милости Его миру прилежно прославляя,// непрестанно со Ангелами поя дивную песнь: Аллилуия.

Икос:

Како возмогу по достоянию воспети тя, преподобне отче Лукиане?/ Всесильное Духа Святаго действо от юности богатно в тя вселися,/ и Божиим мановением движимый, распялся еси мирови,/ и тесным путем шествуя, Небесных селений радостно достигл еси./ Призри убо со священных высот на хвалящих тя и тепле вопиющих:/радуйся, преподобне Лукиане, светильниче веры и добродетелей учителю.

Песнь 7-я

Ирмос: Божия снисхождения / огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице ликующе, пояху:/ благословен еси, Боже отец наших.

Яко избранный воин Христов, преподобне Лукиане,/ мысленному кумиру – греху не послужил еси,/ в пещи искушений пребыл еси в надежди Божий,/ темже от огня страстей невредима сохрани тя Вседетель, поюща:/ благословен еси, Боже отец наших.

Благодатию Святаго Духа орошаем, преподобне,/ яко крин в пустыни добродетельми процвел еси,/ и благоухания Христова исполнил еси землю нашу,/ темже блаженную кончину приял еси, взывая:/ благословен еси, Боже отец наших.

Лютыя вражия помыслы нивочтоже вменив,/ в богоугодие единое ум свой отлучил еси, Лукиане блаженне,/ во плоти аки безплотен явился еси на свою плоть ратованием/ и Богом спасаем без скорби пребыл еси, вопия:/ благословен еси, Боже отец наших.

Богородичен: Ново отроча рождши Пребезначальнаго Слова,/ обетшавшыя ны грехом обновила еси, Дево,/ и пети укрепила еси:/ отцев Боже, благословен еси.

Песнь 8-я

Ирмос: Седмерицею пещь / халдейский мучитель/ богочестивым неистово разжже / силою же лучшею спасены сия видев,/ Творцу и  Избавителю вопияше:/ отроцы, благословите,/ священницы, воспойте,/ людие, превозносите во вся веки.

Ангелы собеседники имел еси, преподобне отче,/ и теми укрепляем, многия гонения претерпел еси незлобиво,/ ныне же со святыми поеши хвалебную песнь Триединому Богу:/ отроцы, благословите, священницы, воспойте,/ людие, превозносите во вся веки.

Жертву безкровную приносил еси Богу со слезами,/ показася бо священник Христов достоприятен,/ проповедуя Того милости и немолчно Спасу взывая:/ отроцы, благословите, священницы, воспойте,/ людие, превозносите во вся веки.

Евангельскаго послуша гласа, земное отечество оставил еси,/ пощением бо, молитвами и слезами Богови соединився/ и ныне в Небеснем отечестве со безплотными лики поеши Богу:/ отроцы, благословите, священницы, воспойте,/ людие, превозносите во вся веки.

Богородичен: Вода еси неисчерпаемая, Дево,/от Неяже вси пиюще, благодати исполняемся,/ душею и телом освящаеми.

Песнь 9-я

Ирмос: Ужасеся о сем Небо/ и земли удивишася концы,/ яко Бог явися человеком плотски,/ и чрево Твое бысть пространнейшее Небес./ Тем Тя, Богородицу/ Ангелов и человек чиноначалия величают.

Новый благотечный источник в земли Александровстей явися, Лукиане богоносе,/ идеже обители благознамениты Божия Матере создал еси,/ в нихже купножитие, едино сердце и душу имущее, уставил еси, мудре,/ пророческому гласу и святых отцев учениим последуя/ в назидание и спасение душ наших.

Нетленными дары и духовными обогатився, святе Лукиане,/ пастырь овцам, пасомым на пажити Божия Матере, показася,/ смиренномудро поучая и возбуждая к покаянию, и ко Христу приводя./ Ныне, преподобне, приемля на небеси почести трудов твоих,/ не забуди нас, твое преставление светло празднующих.

Егда краснии твои нозе, добре по пути спасения текшия,/ на одре смертнем простерл еси, блаженне Лукиане,/ тогда ученицы твоя, слезы точаще, глаголаху:/ кому оставляеши чада твоя, отче, ихже добре собрал и мудре паствил еси,/ помощию Богоматере укрепляем,/ еяже во смирении духа присно величал еси.

Богородичен: Просвети, Чистая Дево,/ сетующее сердце мое присно преступленьми,/ и житейскими многими молвами;/ не остави мене врагом быти в радость, / яко да славлю Тя и любовию пою, Препетая.

Светилен:

Свет Единосущныя Троицы восприим в сердце твоем, преподобне Лукиане,/ возсиял еси в земли нашей яко солнце добродетелей лучами/ и святых светлости зрети и блаженства вечнаго наслаждатися сподобился еси,/ темже молися о нас, память твою светоносную прославляющих. /дважды/

Слава, и ныне. праздника: Адаме, обновися:

На хвалитех поставим стихов 6 и поем стихиры праздника 3, глас 1-й, и преподобному 3, глас тойже:

От юности прилепився Владыце всех / и отрок сый, мужемудренно к подвигом устремися,/ славу маловременную оставил еси и в пустынь вселися;/ во смирении мнозе и умилении души служа Богу./ Блаженни пречестныя обители твоя ихже основал еси,/ блажени ученицы твоя, иже таковаго отца чада нарекошася,/ прославльшаго на земли Господа славы/ и по достоянию от него прославляемаго.

Вне плоти и мира добродетельми быв,/ телом в пустыне живя, духом на Небесех обиташе/ и Святому Духу прекрасная обитель явися,/ от Негоже дара пророческаго сподобился еси./ Постом и молитвою до конца невидимых враг низложив,/ терпел еси вся, приключшаяся тебе благодарственне./ Темже утешения Божественнаго и непрестаннаго веселия/ ныне наслаждаешися Лукиане преславне.

Дал еси во образ нам благоугождати тебе, Господи,/ иноков правило, Лукиана богомудраго./ Той бо есть красота церковная и утверждение земли нашея,/ грешным к Богу теплый молебниче и любы, нас согревающая./ Честна, пред Господем твоя смерть бысть, преподобне,/ и прерадостна нам твоя память, боголюбезне,/ приклонися милостивно к гласом хвалебным, отче,/ моля Христа Бога даровати нам велию милость.

Слава, глас 6:

Духовный лик днесь  совокупльше,/ божественне возвеселимся/ в священнейшей памяти/ Лукиана преподобнаго,/ честныя мощи его/ обстояще любовию,/ той бо вся концы земли нашея/ просветил еси добродетельми своими,/ сего ради и душ попечение восприял еси./ И ныне паки во время благоприятно / иноков во обители своя собирает,/ воздвизая к ревности богоугоднаго жития,/ и в Триех Лицех славимому Богу/ присно молится о душах наших.

И ныне, праздника, глас тойже: Сей день Господень:

Славословие великое и отпуст.

НА ЛИТУРГИИ

Блаженны праздника и святаго. Прокимен праздника и святаго, глас 7-й: Честна пред Господем: Апостол к Галатом, зачало 213. Аллилуиа, глас 6-й: Блажен муж, бояйся Господа: Причастен праздника и святаго: В память вечную:

МОЛИТВА

О, блаженне отче Лукиане, светильниче веры, добродетелей истинный учителю, труждающихся и обремененных святый образ, в терпении столпе крепкий, во благочестии река неистощимая, страсти, плотския удобь до конца мужески попра, бесовския вся козни доблественне победи, ангелом присный собеседниче, яко безплотен на земли пожив, и ныне дерзновенно предстоя престолу Небеснаго Царя, Егоже обстоят Безплотнии силы, победную песнь с ними ему возсылаеши со всеми святыми, в радости зря вышнюю и неизреченную красоту жизни вечныя. Молим тя, подвижниче наш добрый, упаси и спаси люди твоя молитвами и молением твоим, теплым твоим предстательством пред Пречистым и Всемилостивым Спасом от всех соблазнов мира сего, от вражды и свар, в землех наших царящих, от раскола и ересей, гордостию от Церкви отходящих, наставляя презирати похоть плоти, преходит бо. Насади и умножи в нас веру Христову, да едини будем душею, яко камень краеугольный, на немже Церковь свою Христос зиждит вечно, разрушая твердыни всякия ада. Настави нас к покаянию и смирению души, да сподобимся многих милостей Божиих, Духа Господня, ходяще во обновлении ума и усердно творяще повеления Христа Бога нашего. Жизнь Небесную восприимем прежде смерти зде, наипаче тамо, в отечестве Божественнем и святем, безконечно прославляя в нем вкупе с тобою Жизнодавца Бога, в Троице покланяемаго, Отца и Сына и Святаго Духа. Аминь.